شقيق تامر يوصف لنا: مواقف تامر الانسانية فى حفل عيد الحب ... مين زيك يا تامر

طبعا تامر مش انا اللى هحكيلكم عليه
بس مارو طلبت منى دلوقت أحكى للناس اللى مدروش يروحوا الحفلة كل اللى حصل

اول حاجه احب أقولها ان احنا تعبنا و صوتنا راح و تامر متعبش
4 ساعات متصلة تامر بيغنى موقفش
انا و حسام كنا على المسرح واقفين تعبانيين قاعدين برضه مش مرتاحين
و تامر ماشالله عليه رايح جى على المسرح بيغنى و يرقص و يهزر
و كله فى حب مصر حفلة كل اللى مشترك فيها متبرع بمجهوده
و مع ذلك تامر غنى بكل حب و كل قلب و من غير تعب
و مين يتعب و هو بيغنى عشان حبيبته مصر

قبل الحفلة سألت تامر محتاج منى ايه اساعدك فيه
قالى تبرعات عايزين نلم تبرعات على قد ما نقدر
قلتله متقلقش اللى نيته خير ربنا بيساعده و يسهله شغله و انت نيتك خير

أول ما وصلت كان تامر موجود قبلى يعنى قمة فى الالتزام
دخلت و سلمت عليه و قعدت و لقيت الموجودين بيحكولى
و احنا هنا كان فيه بنت بيقولولى قاعدة من الصبح
قبل الحفلة بيخرجوا كل الناس عشان يفضوا الباك ستيدج
هى عرفت ان تامر دخل و هما بيحاولوا يخرجوها
البنت انهارت و فضلت تصرخ و تعيط تامر سمعها
قال للناس فيه ايه مين الطفل اللى بيصرخ ده
و طلع لقى البنت زعق للبودى جاردز
اخد البنت معاه و هداها و جابلها مياة تشرب
و اتكلم معاها و هداها تماما و قالها يالا اطلعى بقى عشان تشوفينى و انا بغنى

صدقونى مغنيين كتير غير تامر مش بيعملوا كده
الكلام ده ورا الستيدج يعنى ولا حد شايفة ولا قدام كاميرات
بس هو فيه حد شايفه و ده اللى تامر دايما بيعمل حسابه "ربنا"
صدقونى فيه مغنيين قدام الناس بتزق معجبينها عشان يبعدوا عنهم
مشفتش حد فى حنية ولا طيبة تامر مع معجبينه

المهم قبل ما تامر يطلع علىطول دخلتله تانى
كان بيقرأ قرآن زى ما متعود و كان شكله قلقان طبطبت على كتفه و قلتله قلقان ليه
الارض مش باينة من كتر الناس اللى بتحبك و مستنيينك
قالى بخاف دايما لو واحد يحصله حاجه او يتعور او حتى يروح مش مبسوط
قلتله متقلقش

و دخلنا فى حديث مطول عن فايدة المياه لجسم الانسان و بالذات الاحبال الصوتية
ما علينا المهم تامر كان جاهز خلاص
كان لابس جينز ازرق و قميص ابيض و كرافت سوده و بلوفر ابيض مع رمادى و جاكيت اسود
قلتله انت هتتحر قوى كده يا تامر
قالى احترام مصر واجب لازم نطلع بالملابس الرسمية
و ضحكلى و جرى على المسرح عشان يرمى نفسه فى حضن جمهورة

و هو تامر بيغنى ولد اسمه محمد اغمى عليه
تامر وقف الغنى و قالهم مين الولد ده وسعوا عشان يعرف يتنفس
قالولوا اسمه محمد فضل ينادى عليه لحد الولد ما فاق
و قاله انا مش هكمل غنى الا لما تقولى انك كويس
و فعلا الولد رد عليه و تامر كمل غنى

موقف تانى مع طفل صغنن اسمه يوسف
تاه من اهله طلعوه على المسرح و فضل تامر ينادى على اهله لحد ما لقوه

اما بقى اللى يوريكم ان تامر نفسه كل الناس توصل لاحلامها بجد
واحد طلعله على المسرح حضنه و قاله انا نفسى اغنى
انا بحس انك اخويا و قال للناس انا بحب تامر اكتر من نفسى
تامر اداله المايك و الولد غنى ارجعلى
تامر قال للفرقه اعزفوا معاه
و خلاه يغنى الاغنية كامله و نزل من على المسرح معزز مكرم
مين بيعمل كده

طبعا بشكركم عل تبرعاتكم و على كرمكم و على حبكم لاهلكم و اخواتكم
بشكركم اكتر على حبكم لبعض و لتامر و لمصر
يارب يجعل ايامنا كلها عيد حب
حب لبعض
و حب لمصر